Phili 2 | ATA | STEP | Aloxo ne, la sou eni atali'isinge aloxo 'o. Maulingenge noxou Kalisito ne, mu'oxonu xavutalamengi pekia'u? Mo tanutanuxu noxou muxolixolingengi? Mo ngingi ngongi'a Uleenu Tavuna ngexolu ngepita? Xe ngingi ngamasaxai'a mo tangengixa'a ta menexinge?

a 2:3Xal 5:26

b 2:41Ko 10:24

c 2:6Ioa 1:1-2, 17:5

d 2:7Ioa 1:14; 2Ko 8:9

e 2:8Eva 5:8, 12:2

f 2:9Apo 2:33; Ep 1:20-21; Eva 1:3-4

g 2:10Rom 14:11

h 2:11Rom 10:9

i 2:15-16Tan 12:3; Pil 1:10; 1Te 2:19

j 2:18Pil 3:1, 4:4

k 2:212Ti 4:10

l 2:25Pil 4:18

Philippians 2

Iesu Mutaloxolixu La sou Laixe Lexe Nenge Kalumo Tataloxolinenge

1 Aloxo ne, la sou eni atali'isinge aloxo 'o. Maulingenge noxou Kalisito ne, mu'oxonu xavutalamengi pekia'u? Mo tanutanuxu noxou muxolixolingengi? Mo ngingi ngongi'a Uleenu Tavuna ngexolu ngepita? Xe ngingi ngamasaxai'a mo tangengixa'a ta menexinge? 2 Lexe ngingi ngakolileli laixe, la eni avikalangengi aloxo 'o. Ngingi xavutalamengi vilesisi mo ngingi tangengixa'a ta menexinge no 'a opo ilou xavutala vilesisi. Ngingi nga'oxonu aloxo ne, la eni a'osa manina. 3 ^aMo eni avikalangengi la aloxo 'o. Lexe ngingi nga'oxonu mii ma'ia, la mamu sou ngaxavutalangengisi mo nga'oxonu sou ane'i i'itinu ualasingesi, ia ngataloxolingenge mo ngamaisi'a ta menexinge loxo ane'i teitexi noxinge. 4 ^bMamu sou ngingi ngaxavutalanu mimemimengisi mo maulignengesi. Ia ngaxavutalanu ta menexinge mi'ami'a mo maulixa'a kalumo.

5 La sou ngingi ngano'u xavutala laixe aloxo noxou Kalisito Iesu.

6 ^cAnu Lataua manina, ia uxavutala lexe Anu Lataua mo utetelisou xavi noxou Lataua uasi.

7 ^dIa Anu muxolu vitanisi loxo itema sou xaixaisi noxou Lataua mo muxali loxo nenge ta mitema 'osi.

8 ^eMo ta mitema mimaisou loxo itema. Ia Anu mutaloxolixu mo mumulinu masaxa nouxou Momu mulai mutalo no anu soli noxou no mine mililixu teitexi no ovu valautu.

9 ^fXo Anu mu'oxonu aloxo ne la sou Lataua mutelailixu muxolu teitexi manina, mo mulosou uala ane mutila no anu uala tavu'alo mukalusi,

10 ^gmo sou no anu uala noxou Iesu ne, la ta mitema xe ta mimii latala ukalusi teitexi no opo loxotolo, mo no lia 'o, mo no tuala noxi'a ane'i ane misoisoli ixola'u tava'a sou ilotu noxou.

11 ^hMo ta mitema latala ukalusi ipala'alixu Iesu Kalisito lamana no 'a anaxa'a lexe, “Anu Tila.” La sou ane'i i'itinu Lataua Maminge ualasou.

Ngakaakaa loxo ta Oto

12 La sou ta menexilo e eni emasaxainge misevile. Aloxo ngelomuxo utotomu no mine nenge nenge'a texolu mo ngalomuxo lailaixe no mine eni e'umesinge 'o, ngasolonu ngaxaxaisou mauli ane kaluxu uasi e ngeno'u mukalu. Ngaxaxaisou mauli ane ne, la nga'ume mo ngamama'u. 13 Xo Lataua anu muxolu noxinge mo uxaxaisinge sou nga'osasou ngamulinu masaxa noxou mo nga'oxonu xaixai ane anu mumasaxa lexe ngingi nga'oxonu.

14 Mo nga'oxonu xaixai mii ma'ia, la mamu sou ngakalakalapu piena mo nga'otosou anangengesou. 15 ⁱMo sou ngingi ngaxali ta mitema ane imaisou susu vile noxinge la ivikala piena no anu uasi. Mo ngaxali Lataua ta 'olu ane susu vile uxolu noxinge uasi no taiine'i ta mitema ane ta masumasua mo xavutalane'i masumasua. Ngaxolu no taiine'i, la ngakaakaa loxo ta oto. 16 Mo ngatetelisou vaikala sou mauli pekia'u. Nga'oxo aloxo ne, la eni a'itinu ualasinge no voxo ane Kalisito ulivu une'e. Xo anu umaxa'u lexe xavileli mo xaixai noxilo ne, mii vitanisi uasi. 17 Ngingi ngemulaxu tangengi noxou Iesu, la sou nga'oxo'oxonu xaixai ulai noxou Lataua. Ia lexe eni asoli mo sialuxo unixi no anu xaixai ne la loxo ane'i inixi'u uaini loxo iaiama noxilo ulai noxou Lataua, la eni a'osa mo nenge nenge'a ta'osasi. 18 ^jLa sou laixe lexe ngingi kalumo ne, nenge nenge'a ta'osa.

Timoti Ilou Epapulotitosi

19 Ia eni emasaxa manina lexe eni 'ala'alai sou apalusou Timoti ulai noxinge lexe Tila Iesu uvikalaleli, la sou eni kalumo a'osa no mine alomusou a'alosinge noxou. 20 Xo eni axalisou itema vile ane mulavusou masaxa noxilo loxo anu Timoti 'o uasi. Anu uxavutalangengi loxo eni axavutalangengi. 21 ^kXo ta mitema ukalusi ne ixavutalanu mii noxi'asi ia ixavutalanu mii noxou Iesu Kalisito uasi. 22 Ia ngingi ngelavusou lexe Timoti mu'oxonu xaixai laixe noxou. Mo nexi noxou tapita taxaxaisou a'alo laixe noxou Iesu loxo itema vile ilou 'olu. 23 La sou eni emasaxa manina lexe eni apasipaa apalusou no voxo ane eni elavusou lexe mii ma'ia uxali noxilo. 24 Mo elavusou manina lexe eni kalumo 'ala'alai sou ane'e noxinge lexe Tila uvikalaleli.

25 ^lIa eni exavutala lexe eni apalusou Epapulotitosi ulivu ulai noxinge. Anu vivilo noxou Iesu, mo noxou texaxai tepita, xe anu mutulu no pa'umelo loxo itema sou 'oto'oto. Mo anu kalumo itema sou uno'u vaikala ulai noxinge ane ngepalusou mune'e sou usu'ulileli no anu mii ma'ia ane eni emasaxau. 26 Eni apalusou ulivu, xo anu tanu u'oxongenge ngingi latala mo umasaxa umaisinge la, la opo tu'umaxu. Xo ngingi ngelomusou lexe anu pipiena mu'oxonu. 27 Anu mupipiena ne, manina mo sexasisi sou usoli, ia uasi. Xo Lataua mualaunasou. Ia Anu ualaunasousi uasi, Anu mualaunasilo kalumo sou musu'ulileli la eni axamulinu tu'utu'umaxu malaxo loxo tei uasi. 28 Aloxo ne, la sou eni apasipaa mo apalusou ulai noxinge. Mo sou ngingi ngamaisou la, la nga'osa. Xe eni kalumo opoleli uai se'isisi sevile. 29 Anu ulai uxali noxinge, la ngingi ngasexelaxu mo nga'osasou manina loxo ta mitema noxou Tila i'osasi'a mo ngataxane'i ta mitema aloxo anu ne. 30 Xo 'ala'alaisi, la anu usoli no anu xaixai noxou Kalisito ia uxavutalanu maulixu uasi. Ia anu mu'oxonu aloxo ne noxilo sou muno'u taningenge. Xo ngingi nga'oxonu noxilo uasi.